बाढी तथा विपद्का कारण प्रभावित बनेका नुवाकोट र रसुवाका नागरिकलाई प्राकृतिक स्रोत द्वन्द्व रूपान्तरण केन्द्र नेपाल (NRCTC-Nepal) ले राहत सामग्री सहयोग गरेको छ। विपद्मा परेका परिवारको तत्कालीन आवश्यकता पूरा गर्न संस्थाले विभिन्न प्रकारका खाद्यान्न तथा दैनिक उपभोग्य सामग्री उपलब्ध गराएको हो।
२०८३ भदौ १२ गते नेपाली सेनाको सैन्य तालिम केन्द्र, बट्टार नुवाकोटमा राहत सामग्री हस्तान्तरण गरिएको हो। बाढीपीडितका लागि आवश्यक पर्ने सामग्री संकलन गरी सैन्य तालिम केन्द्रमार्फत प्रभावित समुदायसम्म पुर्याउने व्यवस्था गरिएको जनाइएको छ।
संस्थाले उपलब्ध गराएको राहत सामग्रीमा पोलार ब्लाङ्केट, खाने तेल, भाँडा धुने साबुन, नुन, गरम मसला, चिउरा, दालमोठलगायतका खाद्य सामग्री छन्। त्यसैगरी मञ्जन, दाँत माझ्ने ब्रस, नुहाउने साबुन र EPE फोमसमेत वितरण गरिएको छ।
राहत सामग्री सैन्य तालिम केन्द्रका सहसेनानी दजिल जंग शाहीले बुझेका थिए। प्राकृतिक स्रोत द्वन्द्व रूपान्तरण केन्द्र नेपालका कार्यकारी निर्देशक चुप बहादुर थापाले राहत सामग्री हस्तान्तरण गरेका हुन्।
कार्यकारी निर्देशक थापाले विपद्का बेला प्रभावित नागरिकको साथमा उभिनु सबैको साझा जिम्मेवारी भएको बताए। बाढीपहिरोजस्ता प्राकृतिक विपत्तिले नागरिकको घरपरिवार, खाद्यान्न र दैनिक जीवनमा ठूलो असर पार्ने भएकाले तत्काल राहत तथा सहयोग आवश्यक पर्ने उनको भनाइ छ।
“विपत्तिमा परेकालाई सहयोग गर्नु मानवीय धर्म हो,” थापाले भने। विपद्का समयमा पीडितको पीडा कम गर्न सरकारी निकाय, सुरक्षा निकाय, सामाजिक संस्था तथा नागरिक समाजबीच सहकार्य आवश्यक रहेको उनले बताए।
उनका अनुसार राहत सामग्रीले प्रभावित परिवारलाई सानो सहयोग पुग्ने छ । विपद्पछि प्रभावित नागरिकको जीवन सामान्य अवस्थामा फर्काउन राहतसँगै पुनःस्थापना, पुनर्निर्माण र दीर्घकालीन सहयोगमा समेत ध्यान दिनुपर्ने आवश्यकता रहेको उनले बताए।
नुवाकोट र रसुवाका विभिन्न क्षेत्रमा बाढी तथा पहिरोका कारण जनजीवन प्रभावित हुने गरेको छ। वर्षायाममा नदी तथा खोलामा पानीको बहाव बढ्दा तटीय क्षेत्रमा बसोबास गर्ने परिवार जोखिममा पर्ने गरेका छन्। सडक, पुल तथा अन्य भौतिक संरचनामा क्षति पुग्दा प्रभावित क्षेत्रमा राहत तथा अत्यावश्यक सामग्री पुर्याउनसमेत कठिनाइ हुने गरेको छ।
यस्तो अवस्थामा स्थानीय तह, सुरक्षा निकाय, सामाजिक संस्था र नागरिकको सहकार्य महत्वपूर्ण हुने गर्दछ। प्रभावित नागरिकको तत्कालीन आवश्यकता पहिचान गरी लक्षित परिवारसम्म राहत पुर्याउन सके विपद्को असर केही हदसम्म कम गर्न सकिने सरोकारवालाको भनाइ छ।
राहत सामग्री हस्तान्तरण कार्यक्रममा सहयोगलाई प्रभावकारी रूपमा प्रभावितसम्म पुर्याउने विषयमा समेत छलफल भएको थियो। बाढीबाट प्रभावित परिवारको अवस्था बुझेर आवश्यकताका आधारमा आगामी दिनमा थप सहयोग र सहकार्य गर्नुपर्नेमा जोड दिइएको छ।
विपद्को समयमा गरिएको यस्तो सहयोगले प्रभावित परिवारलाई तत्काल राहत दिनुका साथै उनीहरूलाई आफूहरू एक्लो नभएको अनुभूति गराउने अपेक्षा गरिएको छ। मानवीय संवेदनासहित गरिने सहयोग र सामूहिक प्रयासले विपद्ब बाट प्रभावित समुदायलाई पुनः सामान्य जीवनतर्फ फर्किन थप हौसला पुग्ने विश्वास गरिएको छ।
